આજકાલ દરેક વ્યક્તિનું વિદેશ જવાનું સપનું હોય છે અને આ સપનું સાકાર કરવા માટે આર્થિક રીતે સક્ષમ હોવું અને ખાસ કરીને વિઝા મેળવવું જરૂરી છે. વિઝા મેળવવું ખૂબ જ મુશ્કેલ છે અને તેના કારણે ઘણા લોકો ગેરકાયદેસર રીતે જાય છે અને મુશ્કેલીમાં મુકાય છે. આજે અમે તમને એક એવા મંદિર વિશે જણાવીશું જે વિદેશ જવા ઈચ્છતા લોકો માટે આસ્થાનું કેન્દ્ર છે.
આ અનોખું મંદિર અમદાવાદના ખાડિયા વિસ્તારમાં દેસાઈ રોડ પર આવેલું છે. 150 વર્ષ જૂનું અને પ્રાચીન હનુમાનજી મંદિર વિદેશના વિઝાની માનતા માટે પ્રસિદ્ધ છે. એવું કહેવાય છે કે, આ મંદિરમાં દર્શન કરવા જાઓ ત્યારે તમારે તમારો પાસપોર્ટ લઈ જવાનો જેથી કરીને પૂજારી પાસપોર્ટને હનુમાનજીને દેખાડે છે. તેમની આગળ સંકલ્પ મુકાવ્યા બાદ ભક્તને વિઝા મળી જાય છે.
જણાવી દઈએ કે, 20 વર્ષથી આ મંદિર વિઝા વાળા તરીકે ઓળખાય છે. જે લોકો શ્રદ્ધાપૂર્વક હનુમાનજી પાસે વિદેશ જવાનો સંકલ્પ કરે છે અને તેમને વિઝા મળી જાય છે. ખાસ વાત તો એ છે કે, વિઝા મેળવવા માટે માત્ર અમદાવાદ નથી પણ દૂર દૂરથી લોકો આવે છે. આ હનુમાનજી પત્યેનો તેમનો વિશ્વાસ છે અને સાચું કહીએ તો અનેક ભક્તોને દાદાના કારણે વિઝા મળ્યા છે.
આ મંદિરમાં ખાસ કરીને શનિવારે અને મંગળવારે ભારે ભીડ જોવા મળે છે અને સૌ કોઈ ભક્તો પોતાની મનની ઈચ્છાઓ લઇને આવે છે અને દાદાના ચરણોમાં પ્રાર્થના પણ કરે છે. ખરેખર આ મંદિર દરેક શ્રદ્ધાળુઓ માટે આસ્થાનું કેન્દ્ર છે. અનેક લોકો વિદેશ જવા માટે અનેક ઓફિસના ચક્કરો મારે છે પણ વિઝા પાસ થતા નથી. પરંતુ, આ મંદિરમાં માત્ર દાદા પાસે સંકલ્પ કરવાથી ભક્તોને વિઝા મળી જાય છે.
